قطرات من شعر أحمد الناصر

[عُروب]

أذن المذن...

أذن المذن ونادى طول صوته بالمناره
وقمت طولي للسفينة ثم فليت الشراعي

لو يزيد الموج ماني فالبحر سواق طاره
عارفٍ مجرى السفينة في نزولٍ ورتفاعي

كل رجال ٍ هواجيسه على قد اقتداره
والحظيظ اللي مع العربان عاقل واجتماعي

العرب لو بشروني كان سلمت البشاره
في بيوت مخترعها طيب العرف اختراعي

بين الأثنين المفاهم في محله والمشاره
لو يجون اخوان صلب أو هم خوان من الرضاعي

حجة الغايب معه ومن اعتذر قبل اعتذاره
مايضيقن النفوس ولا الدروب اللي وساعي

وانت عندك لاتعلم بالثمانين الحراره
والهروج الضايعة مثل الهمل من غير راعي

صابر بالحق دام الحق من جار ٍ لجاره
لو نجيبه دين ياصالح من البنك الزراعي

والسعادة حظ والا العرف والمعنى شطاره
لو رضاك بعيد اسافر له على النقل الجماعي

وسع الخاطر ولابه كسر يحتاج الجباره
دايم العاقل وسيع ابطان ماهوب اند فاعي

اعتذرت من الرفيق وزبدة الهرج اختصاره
إن عذرني كثر خيره وإن ومر بأمره مطاعي

قصة جت من رفيقك غصب من غير اختياره
سألفه ومخالفه ماودنا الهين يذاعي

مازال للشاعرنا ....
صولات وجولات.....

[عُروب]

نوم الليل


يا بعد نوم الليل عن حجر عيني
صبر على ما صار من وال الأقدار

صبرت صبر باح منه الكنيني
أضحك مع العالم وكني على نار

ما غير أهوجس بين نفسي وبيني
يعلم بها العلام في كل الأسرار

تقل اتحرى لي علوم تجيني
مع الطروش اللي يجيبون الأخبار

فهمت رأس العلم من كلمتيني
من يوم قالوا جا محمد ونصار

تكسّرت عقبه جرايد يميني
عز الله اني عقب ما صار صبّار

من عقبها ونيت لي ونتيني
ونة غريب بالخلا ضاع واحتار

لولا الله أبرك ثم قوة يقيني
لا طير مثل الطير من كف صقار

تخنقني العبره وأفرّك يديني
واحترت مثل مصالي النار والغار

علم يخلي كل قاسي يليني
كنه على قلبي رصاص أم كرار

الى ذكرت عياله المصغريني
هذا يعزيهم وهذاك زوار

احد على جنبه واحد له ونيني
جتني هموم القلب من كل الأقطار

قلت اصبروا والله مع الصابريني
الله يكافيكم صواديف الأشرار

عسى عوضنا الحي بالميتيني
ناصر ونايف ذخرا سر واجهار

وأحمد وعبدالله ذرانا الحصيني
صغار سن وان بدا اللازم كبار

يجبر عزاي اللي بخلقه ضميني
محيي العروق الميته عقب الأمطار

مالي عن المكتوب فوق الجبيني
لو رحت شرق وغرب ويمين ويسار

صليت نصف الليل لي ركعتيني
أطلب له اللي للخطيات غفَّار

خفف ذنوبه يا أرحم الراحميني
في ماقفٍ ما ينفعن فيه الأعذار

جعله برضوانك من الفايزيني
بالماقف اللي به يضيعن الافكار

في ماقفٍ به كل خافي يبيني
تمت وصلى الله على سيد الأبرار

مازالت هناك .....قطرات

[عُروب]

كل من عاش




كل من عاش بالدنيا يشوف العجايب
مثل ماشفت بالدنيا وشفته باهلها

قمت ابرق وافرق بين مخطي وصايب
مثل فرق الجبال النايفه من سهلها

والتوافيق عند الله حظوظ ووهايب
عند رب يجازي كل نفس بعملها

اشهد ان الهدوم يسترن المعايب
اثرها تستر الحرمه وتستر فحلها

الاوادم بعضهم مثل وصف الجلايب
لو توحد بها ذيب الخلا كان اكلها

كم صبي تحسب انه على الضرايب
وان بخصته كرهت الديره اللي نزلها


مايسر ان حضر وان غاب ماقيل غايب
مار الارزاق عند ربٍ لخلقه كفلها

مايضد الضديد ولايفيد القرايب
يوم نفسه تعدى حدها من زعلها

وفيه رجل يحل المشكله والنشايب
كل ماحملوه الواجبات احتملها

واقفٍ للزوم ومرتكي للنوايب
والحمول الثقيله مالها الا جملها

ليت روحه قبل تركز عليه النصايب
حط عنه اربعين من الزلايب بدلها

وفيه منهو مسالم مايحب الطلايب
مشتقى من رضى نفسه ولا من زعلها

وفيه منهو اذا كبرت عليك المصايب
ساق وجهه وجاهه لك ونفسه بذلها


وفيه منهو يبا الجودا فلاشك هايب
كل ماناض صدره جى عضوده خللها

وفيه منهو يحل المعجزات الصعايب
اصغر افعاله الجزلات محدن فعلها

وفيه منهو يعيش وعيشته بالسبايب
كل ماسمعله غلطة من رفيقه نقلها

وفيه منهو على نفسه رضى بالغلايب
الله اللي رفع نفس ونفس خذلها

لو تبي تنصحه لله نجر الهبايب
انكرك والنصيحه ردها ماقبلها

اشهد انه عقوبه من كبار العقايب
قاصر المعرفه قلبه كما قلب بلها




لم تقف بعد تلك القطرات.....

[عُروب]

آه من قلب

آه من قلب هواجيسه تلوفه
مع همومه كل ما اقفن واقبلني

لاذكرت اللي زها الحنا كفوفه
يالطيف الحال طار النوم عني

ليت عيني وان بغت شوفه تشوفه
كود قلبي يستريح ويرجهني

حيث عيني عن هوى غيره عيوفه
ماتبي غيره لو انه غاب عني

والله اني طحت في حال المروفه
حيلتي كثر التوجد والتمني

ماذبحني كود من تذبح وصوفه
من جميع البيض حبه ممتحني

عنز ريم مابعد رامت اخشوفه
قايده للصيد ترعى كل ني

والجوازي كنها معها معسوفه
يوم تجفل كلبوهن يجفلني

هرجت العشاق يازين معروفه
والغلا باقصى الضماير مستكني

الهوى مثل المغازي والنكوفه
والقصيدة من سمع فيها يغني

القمر يظلم الى بين كسوفه
لاتبين للعرب ظنك وظني

لازم راعي الهوى تكثر صدوفه
لو يطولن الليال او يقصرني

والمعافى ملحق الدنيا حسوفه
ماطعنه اللي من الفرقا طعني

لو تروح الروح للزين مخلوفه
والعذارى يبعدٍ او يقربني




قطره ...ثم قطره.... تتبعها قطرات

[عُروب]

راعي المحبه

يا ناس راعي المحبة لا تعذلونة
مهوب عن صاحبة دالة ولا سالي

لو يسهر الليل كلة لا تلومونة
الحب بلوى مانيب اول ولا تالي

لى صاحب ما قطعت الياس من دونة
لو غاب عني خيالة دوم يبرالي

الصاحب اللي سحر هاروت بعيونة
ودي بشوقة ولكن ما تهيا لي

يا هيف الخصر عيني فيك مفتونة
والبعد ياصاحبي ما يرخص الغالي

الروح يا صاحبي بحماك مرهونة
عزي لحالي عقب فرقى هوى بالي

ياكود وصلك على مثلي ويا هونه
ان كان حالك طواها اللي طوى حالي

عن غيرك القلب غسلتة بصابونة
والعين ما تلتفت فى كل الازوال


الابيات ....ملطوووشه

[محمد اليحيى]

يثبت ثم نقول ليس ذلك بغريب على اختي فهي دوماً مبدعة

[عُروب]

يثبت ثم نقول ليس ذلك بغريب على اختي فهي دوماً مبدعة

أخي محــ ابوتركي ـــمد اليحيى
لك شكري وامتناني
لكلماتك الداعمه
دوماً هي مصدر ابدعي
لاعدمناك

[غزال الوادي]

تسلم يداك أختي قايد الريم فأنت ريم المنتدي (بصيد الخاطر) بأبداعك وتألقك

[عُروب]

تسلم يداك أختي قايد الريم فأنت ريم المنتدي (بصيد الخاطر) بأبداعك وتألقك

شكراً أخي الكريم غزال الوادي

اخجلتم تواضعنا...