ديـوان الأمير الشاعر بدر بن عبدالمحسن

[عبودي اللغبي]

قصيدة ضاوي الليل
ياضاوي الليل .. نورك أخلف سراجي
خلاّ السفر .. وانطفي في عتمة عيونك
أقبلت .. صبحٍٍ نثر في متنه الداجي
جدايلٍٍ مشّطت بضلوع مضنونك
تسابقتك العيون وجرحي اللاجي
في القلب طفلٍٍ لمحته يقضب ردونك
يا مرحبا .. من ضميرٍٍ ظاميٍٍ راجي
كم ليلة قد طواني الياس من دونك
ليت الليال وعدك .. وكل من داجي
انت .. وجميع الثرى تذكر به ضعونك
---------
قصيدة عيونك
شعرك كساه النور ما باج ظلماه
وخدّك غشاه الليل ما غاب نوره
فــ .. عيونك جنود .. وبواريد ورماه
غزو .. ورمشك صار مقدم سبوره
صبّح به اللي داله القلب بحماه
قبل النذير .. وقبل يملك شعوره
أنا الصويب اللي غشت صدره دماه
شلفا عيونك هشمت مش زوره
يامن يبي ذبحي .. وأبي منع لاماه
روحٍ شكت ظلمك تراها معذوره
---------
قصيدة

واطيري اللي زودوا فيه الأثمان
اشعل ظهر والصدر يجهر شعاعه
لو له شبيه في الملى هو غزالان
راجي عل زينه يزود بشـجاعــه
خذته ولاني يا هل الطير ندمان
من عادتي ما نيب اسوم البضاعه
الى ركز في مجلسي طير حوران
وتجمعوا عندي كثير الجماعه
وشلته على كفي كثير الغثا هان
عندي غدى للهم مثل المناعه
لا صرت فيما تطلب النفس بلشان
اترك طمان القاع وارقا برفاعه
وباكر تصاريفه على عالي الشان
من يضمن الدنيا ولو ربع ساعه
---------

قصيدة فكره

حبيبي من هو غيرك قد عشق فكره
طيف وخيال ونحولٍ يكسر الخاطر
ما حذرك عاذلك من غيه وسحره
ما قال قلبه خراب وموسمه باير
لا بر في دفتره لا شهد في حبره
لا ضي في غربته متبعثر وحاير
كني سمعتك وكل العين منتثره
دمعٍ صرختي ما بين السيف والحافر
لا تذبحونه ألم وأن طال به عمره
فاق بخياله جمال الماضي والحاضر
اللى طعنتوه خلوا شبر في صدره
يلقى به العشق وقت يقيم ويسافر
الكوكب اللي تقول الناس ياصغره
من كثر ما هو بعيد وشوفهم قاصر
لا تحسدونه خذا من خبزكم كسره
للجوع وأعطي شباب القلب والناظر
اللي قليله قليل ٍ فاض من كثره
واللي كثيره قليل الجوهر النادر
اللي قليله قليل ٍ فاض من كثره
واصابعه وان حسبتوا مالها اخر
اصابعه وان حسبتوا كلها عشره
وفي كل صخرٍ بياض عظامها نافر
في كل ارضٍ حفروديناها ظفره
وكل ما بكى كل دمعةٍ تولد بشاعر
كل ما انجرح شع نزفه واشتعل فكره
وكل ما بكى كل دمعه تولد بشاعر
---------
قصيدة قبل الورق وبعد الورق
كثــــر الـــنهـــــار أشــتـــاق و إنــتي بعيـــده
الــــين أشــــوفــــك كثـــر ما تـــنبت أشجـــــار
ومــثـــل الــرمــــال أحــس روحــي وحــيــده
الي أجـــدبت عامـــــــين مـا طــــاحت أمـــطار
طـــال الـــســــهــــر والـــليل ينـــزف وريـــده
في صــدري اهمـــــوم وهـــواجـــيس وأســرار
كــــل الــحــــروف المـــبـــطيـة والجــــديــده
تطــري علي لاشـــك فـي شــوقـــي احــتــار
قبــــل الـــورق وانـــتي فـ بـالـي قـصـــــيده
وبعـــد الــــورق ضيــعــت أنــا كـــل الأشـعـــار

[عبودي اللغبي]

قصيدة كل ما دعاني الشوق
كل ما دعاني الشوق للقلب الأول
القى مكان القلب في الصدر تنهيد
وطيوف ذكرى في الحنايا تجول
تجمع صور وأوراق من باقي العيد
مدري سبقني الوقت والا تحول
أخلف ربيعي وادهرن المواعيد
أو هو الصبا .. نجمٍ رقى ثم حول
غاب وسما وجهي مشيب وتجاعيد
أحبابنا ليت الذي راح طول
وليت الذي باقي لما فات تجديد
انتم مثل قلبٍ عرفته امنول
وأصبح مكان القلب في الصدر تنهيد
---------
قصيدة لاوالذي سواك
لا والذي سواك ما اريد سلواك
ما أخبر به نفسٍ تمنت قدرها
وكان التفرق يا ادعج العين عناك
أنا الذي روحي عذابه صهرها
والله لو ما اعي .. نفسي برجواك
واجزم وَكاد إنه يهمك خبرها
لأطفي شعاع العمر .. لا غيّب ضياك
عميت عيونٍ ما يطولك نظرها
أغلي حياتي .. من ثواني بها ألقاك
لولاك ما تسوى حياتي كدرها
ودنيا خلت من صافي الود وياك
يا عل تكسف شمسها مع قمرها
---------
قصيدة لا من غديتي شمس
لامن غديتي شمس .. وشلون اعذلك
لابد مايظهر مع طلتك نور
ماالومهم لو لدت عيونهم لك
من ناظرك ياربة الحسن معذور
تلطفي وان كحل التيه نجلك
وتواضعي لوبك غدى الحسن مغرور
أغار لو بالزين قد ذكر مثلك
وأغار لو غيري سبقني لك شعور
لاصار لي قلبك .. وروحك .. ووصلك
لاقافلٍ بابٍ .. ولا بانيٍٍ سور
---------
قصيدة لو ما تحب العين

لو ما تحب العين ما ضمت دموع
يا عاذلي بالله جز عن عتبها
اربع ليالي كلها سهد وولوع
استغفر الله ما تلاقي هدبها
تكاثرت من همها ساعة اهجوع
الله حسيب اللي غدى هو سببها
الجادل اللي لفتته ورد وشموع
يا حيف قلبي اللي احترق في لهبها
يمد لي حبلٍ من الود مقطوع
غير السلام وبسمته ما عقبها
يا قلب .. يا قلب الخطا دونك ضلوع
يا شين قل لي راحتي هو نهبها
---------
قصيدة لا تقول
لا تقول ودعتني داري
بالحيل مالي عليك عتاب
مريت في موعدك ساري
وقفت لين النجم ماغاب
الليل تحت الشجر عاري
والفجر غطي السما بثياب
والريح في كفوفها الذاري
تدفن ارسوم الوعد بتراب
مريت ماللوله طاري
ووقفت ماللندم اسباب
مدري تعودت مشواري
أو خان بي قلبي الكذاب
---------
قصيدة لاتعلمني

ليه أحـــس إني وأنا اشوفــك حزين
وقــلبــي الـلـيـلــه بــهـــمــي ممتـلــي
كانهـــا الفــرقى طلبـــتك حـــاجتين
لا تـــعــلــــمنــي ولا تـــكـــذب عـلــيّ
خـلنــي مــا بـــين شكــي والــيقيــن
الــسـكــوت رضـــــاي عنــك وزعلــي
بــاكــر الـلــي خـــافــيٍ لازم يبيــن
والــوعــــد بـلقــى مكـــانك بــه خلــي
وانتظــــــر لــي ليلــة او لـــيلتيـــن
لين مـا يـقـفـــي الـسحــاب وينجلـــي
ولا طويت اليـــاس بـذرف دمعتين
للـهــوى الــغــــالــي وبـا وادع هـلـــي
صاحبي بمـــــوت من كثر الحنيـن
خــلـنــي بــخـــتـــار لــحظـــة مقتلـــي
---------

[عبودي اللغبي]

قصيدة لا تعقد الحبل
شمالٍ هبت ورذرذ مطر ما به ذرى وخطار
تبي تدفا في تالي الليل والخشبان مبتله
ألا ياضيف وش جابك عسى ما جيتني دوار
مضيع والنياق اللي تدور عنها مندله
سرحت افـ خاطري ذودك ذلول وفاطرٍ وحوار
تبي تاكل ربيع المجرهده دقه وجله
ألا يا شين لو ذودك رعايا تحتميها امهار
أظنك ما تراعي للخلايق سلمٍ أو مله
ترى ضرب الفيافي ما يجي للخايف ال
أمانه لاتعقد الحبل ثمٍ تعجز تحله
سرت عنك المطايا .. والمطايا عينها للدار
تبي تشوف البلاد وصابها خالي الخلا بخله
ضوى همك وشبيت اف ضلوعي نار للخطار
فريت المجذوي .. قلبي دفنته قرص في المله
تعش ولا بدى نور الفجر خل الهقاوي يسار
وعوّد وان سمعت الشور لا تبعد عن الحله
---------

قصيدة لحظة وداع
عيني عن النوم جزاعه
وكثر الهواجيس قزّني
وأشبح متى عقرب الساعة
يطوي ظلام الكدر عني
قلبي زوال الرجا راعه
ما ارتاح يوم ابعدوا مني
وقفت انا لحظة وداعه
أبكي .. وأنا ضاحك سني
مسكين من صاحبه باعه
وعيّن لياليه يشرني
---------
قصيدة ليلي

ليلي مثل ليلك ... او همومنا غير
قلي صباحك مشرقه مع صباحي
إنت السما عندك... نجومه ... نواوير
ومن الفرح عجعج سناها ... وفاحي
وانا نجومي ... في الغداري مسامير
على السما ... دقت بكل النواحي
جاك الظلام .. وجـاك ربع ومسايـير
وجاني الظلام وكل ما احب راحي
علمي بنور الشمس ... وقت المعاذير
قال الوداع وقلت.. دربك سماحي
كان الالم.. غيثٍ فدمعي محـادير
وكان الندم سيلٍ فخدي .. بطاحي
تقول خل الهم واكفخ كما الطير
عطني سما ياخوك والوي جناحي
---------
قصيدة غريق الدمع
اللـي طعنّي بين الاضـلاع وأدمى
هذاك نــدٍ لي ونعمـين فارس
ومن ينطح الوقت الردي قلبه أعمى
كم عامـرٍ خـلاه بالقاع دارس
يـابنت مـالي قلب بـالحب يرمى
كفي سهـام الفاتـرات النواعس
المـا عيـوني أظهـريني مـن المـا
وأنـا غريـق الدمع والريق يابس
ظميـان من مثلي من النـاس يظما!!
وأنـا علـى أحلى الينابيع حارس
والله يالـولا فيّـة عيـون سـلمى
ماشوف كل الناس ضاحك وعابس
مـن طـاب لي بالنـور ماني بظلما
ومن جـادلي بالغيث مـاني بحابس

[عبودي اللغبي]

قصيدة الغراب اللي نعق
ليت ها العين ضاقت بالحدق
قبل جدرانها بوجهك تضيق
والله اني صحيت من الأرق
راحلٍ لا مكان ولا طريق
ما سمعت الغراب اللي نعق
وين مثلي .. على مثله يفيق
منزلي في الطويل الي شهق
ومنزله قاعة الوادي السحيق
قالو الحاقد بدمك شرق
كنه الشوك في ثوبي علق
يوذي الشوك ولا يقطع طريق
كثر ما الريح تعبث بالورق
وتوقد أغصانه الصفراء حريق
وكثر ما شوه العج الشفق
وقص من جيده عقود العقيق
وكثر ما صابني وأخطا التفق
لين ما أصحبت من خوفي طليق
وكثر ما نز في كفوفي العرق
من سلام على غير الصديق
اتركيني على باقي عبق
غيمة العطر من عمري العتيق

قصيدة قمرا
انتي مثل قمراً على صفحة الما
له صورة عندي وهي في السّما فوق
اتصافحك عيني وأنا كفي أعمى
مَالي جدى إلا مصافح الموق للموق
ياما شربتك شوف من خوف لا أظما
وياما الوله للوصل يّبس بي عروق
وياليتني بدلت نورك بظلما
واخترت لي غيرك من الناس مخلوق
اقول أحبك يا عذابي أو أكما
لا حاصلٍ قربٍ ولا نافعٍ شوق

قصيدة القاع والمسافة
انا احبك مابها زيف وخداع
رغم الذي نخفيه .. واللي نخافه
أودعك .. ليت الألم لحظة اوداع
إلى مضت .. ننسى الألم والحسافه
وأفارقك.. لوالسفر .. يم وشراع
وبعد الفراق .. اللي نوده نعافه
لا صار مافي البعد راحه لملتاع
بالله وش نفع التعب والكلافه
من الجفا والصد .. يكفيني اذراع
لا جف نهر الحبماتت اضفافه
املي يدك رمل وترى هذي القاع
ومدي النظر .. تدرين وش هي المسافه

[عبودي اللغبي]

قصيدة قلبي سجد لك
قلبي سجد لك قبل لا يسجد حجاجي
على الثرى اللي تسامى بالنبي أحمد
قصدت مسجد نبيك ..نادم... لاجي
عن كل جرح.. وحزن...وهاجس..أسود
قدست نورك... وغيره مظلم.. وداجي
واخلصت في عبادتك.. ياخالقي فـ اشهد
اشعلت شمسي.. وغيضك يطفي سراجي
وأنت الوحيد الذي على الضرر تحمد
ان تبت عن مدخلي... يا طيب مخراجي
أموت وولد... وموت برحمتك... وولد
لوخضت بحر و أنا في عزتك ناجي
ولو كنت أنا البحر... مالي عزتك بنفد
خمسين حولٍ مريض الطرف وعلاجي
في ركعتين تداوي قلبي الأرمد
نزت عن خاطري خزي وديباجي
شوك... وكستني المحبة ثوب من عسجد
يا هل المدينة سلام كثر ما هاجي
نسيم صبح وناح الراعبي وغرد
على الذي له في عالي الفلك معراجي
نبينا اللي اصطفاه الخالق الأوحد
لاجيب طيبه تهدم برجي العاجي
ظهرت من مثل قبري عاري أجرد
وقلبي سجد له قبل لا يسجد حجاجي
على الثرى اللي تسامى بالنبي أحمد

قصيدة ليل التجافي
آه ... من ليل التجافي ... ماطوله
ليلة العاشق ... ثوانيها ليال
من يقول الشمس باكر مقبله
كل شمسٍ مالها ... وجهك ظلال
بسالك باللي خذى منك الوله
وحطه اف صدري ... واعطاك الجمال
حاكني ... لجل الليالي ...الآوله
آه انا بموت من ذل ... السؤال
هو صحيح انك حبيبي اللي دله
واستوى ... عندك فراقي ... والوصال
كل جرحٍ غير ... جرحك بقبله
وكل ظلم ٍ ...غير ظلمك لي ... عدال

قصيدة الليل والوعد
الله عليم .. إني مليك وأنا حر
لأجل الهوى .. رضيت أنا بظلم سيدي
من عادتي .. مالي جلاده على الضر
واليوم أنا لرضاه باقطع وريدي
لأجله غديت أستعذب العلقم المر
وأضمد الجرح القديم بجديدي
اللي فــ .. وعده لو طال الليل يقصر
وكل لحظة تمضي .. فعمري تزيدي
وسحابه للدمع لاغاب تمطر
تسقي على شفاهي خزامي قصيدي

قصيدة كثرت عذاريبي
يا صاحبي كيف أنا كثرت عذاريبي
أو هو الزمان الذي كثرت عذاريبه
وكان الليالي مثل عرفي وتجريبي
جرحٍ لفت به وجرحٍ بد تاتي به
انا أحمد الله على سدة مواجيبي
لي راس مالٍ رصدته في مواجيبه
مادام راسي عزيزٍ ذي مطاليبي
ما تعذرون الذي عزه مطاليبه
ما اخترت أنا الطيب انا مختارني طيبي
من علم الحر يشهر في مراقيبه
ولا تحسب ان الثني والمدح يطغى بي
حيث أن كثر الثنا والمدح أنا أحرى به
عن نية الجود صعب اليوم تجنيبي
من قيل ذا النجم جدك غصب يسري به

قصيدة النسيان
تذكر النسيان ... لاعاد تنساه
ياقلب ... وانسي القلب لعل يشفا
يدرى الحبيب ... انه حبيبٍ وابجفاه
ماهو خراب الكون ... لاقفيت واقفا
كان الخطا منى ... فقلبي خطاياه
هو علمه ... وشلون ... يهجر ويجفا
تعب المسافر ... وابعد الموج مرساه
صار المدى له يم ... والشمس مرفا
ومل الهوى نوحه ... وبوحه ... ونجواه
ماعاد لى صبر على الجراح ... تكفا
الى متى ...صدري بيحترق حناياه
كنك على صالي ...عظامي بتدفا
والى متى ... جفنى بيسقيك من ماه
كن الليالي لاصفا الدمع تصفا
تذكر النسيان .... ياقلب وانساه
وانسي ... الجروح اللي مع الوقت تشفا

[عبودي اللغبي]

قصيدة هيهات

لادمعة في العين تكفي ولا آه
لا من نوى لك صاحبك بالقطيعه
الله على بعض المحبـين ما اشقاه
يرجي زهــر روضٍ تولى ربيعه
ولا مـن خذا له ساعة قال ابساه
بانسى هوى اللي بـاعني قبل ابيعه
وده يعسر القلب عن غي مشهاه
هيهات ياقلب الخطا لو تطـيعه
الله يجازي الحب مااكبر خـطاياه
شره على اصحاب النفوس الرفيعه
اهـل الوفا واهل الشيم من سواياه
ضاقت بهم دنيا فججها وسيعه
والا الخبيث بمنسم الرجل ناطاه
يوم الغـدر والخبث عنده طبيعه
يالله عسى لي خيرة عقب فرقاه
لوكان فرقا الخل مثل الفجـيعه

قصيدة لاتجرحيني
لا تجرحيني .. جرحك العام ما طاب
داوي بحنانك ما مضى .. واجرحيني
ياللي حنانك نظرة بين الأهداب
ردي علي بعض العزا .. ناظريني
خافي على قلبٍ يحبك إلى ذاب
ذاب الهوى في خفقته .. والحنيني
لولاك ما زار القمر ليل الأحباب
ولا لوحت شمس المحبه جبيني
ولولاك .. ما يلفي على الدّار غياب
ولا تبكي اللي فارق الدار عيني
في غيبتك كل الملا عندي اغراب
ما أحدٍ أبي قربه .. ولا أحدٍ يبيني
لا ياغلا كل القرابه والأصحاب
ضاع العدل في الناس لو تظلميني

قصيدة مالي على الحب سلطان
بمناسبة شفاء صاحب السمو الملكي الأمير سلطان بن عبد العزيز .. وعودته من رحلته العلاجية ..
يا سيدي ما لي على الحب سلطان
انت الذي تامره بأمرك وتنهاه
كلٍ له اصحابٍ .. وربع ٍ .. وخلان
ناسٍ تبي نعده وناسٍ تمناه
إلا أنت كل الخلق في حبك انسان
قلبه معك دايم صباحه وممساه
ياللي وسع صدرك لنا دار وأوطان
ياللي الصخى والطيب فعلك تعداه
أنت البخيل ابمنتك وقت الاحسان
وانت الذي لطفه يسابق عطاياه
ما كل من فارق غدى مثل سلطان
كلٍ يبي شوفه .. وكلٍ ترجاه
لو المرض جيشٍ نطحناه بسنان
ولو الكدر بحرٍ شربناه لرضاه
أنا أحمد اللي بدّل الجهل بإيمان
اللي حفظ عمي وصانه وشافاه

قصيدة وعود وأعذار
عطني فـهواك الصبر لاصرت قاسي
تبدي حنان وداخل القلب جبّار
لا صار قلبك خالي الحس ناسي
وتلعب على المشتاق بوعود واعذار
ولا صار فيك من الأمل كثر ياسي
وعندك يقين وتارك القلب
لا من نسيت اولي نويت التناسي
اترك وراك لباكي العين تذكار
اشرب معاه الوهم لا جف كاسي
و لا ما حصل شوفك أضمك بالأفكار
يا حارمٍ عيني لذيذ النعاسي
ومعذبٍ روحي بجنّتك والنّار

قصيدة نسيم الليل
هب النسيم بريح من مفرقه لاح
عطر.. وسنى من غزة الليل بادي
ما عاتبه موضى جبينه ولا شاح
أعطاه خده .. وانتشى بالبرادي
لا يا نسيم الليل قلب الخطا باح
والعين ملت جفنها من سهادى
يا ليتني مثلك خلي ومرتاح
ما أحد نشد عن غايتي .. عن مرادي
ولا طاب لي غصن من الغى مياح
أروي غليل القلب لا صار صادي
لا شك أنا بالحب كتبت لي جراح
شربي حزين الدمع .. والصبر زادي
لا جيت أبا أدله عن زماني الذي راح
قالت ليالي الشوق00وين أنت غادي

قصيدة نبض الحب
كل حبٍ .. تغير وانمحى
مـن حـنـايـاك يالـقــلـب الـقــديـم
كود نبض على وضحى صحى
أول العمر يوم اني فطيم
لامني الشيب .. وابعدني السحى
لا ارتمى فوق هالصدر الرحيم
أعشق الوضح لاجلك والضحى
وضوح برق الوسامى في العتيم
اقبل الصبح والليل انتحى
ابشري بالفرج والله كريم

قصيدة المحبه أرض
المحبة أرض والفرقا أراضي
والزمن كله ترى لاغبت ماضي
والله إني ما أشوف إلا عيونك
إن رحلت اليوم أو طوّل مراضي
قالوا العـذّال والعـذّال مرضى
وش بلا حالك من الاشواق قاضي
قلت يهجرني حبيبي لين يرضى
علّموا الظالم ترى المظلوم راضي
جرّحوني في هواك وقلت أبشكي
ماهو من جرحي ولكن لـ إعتراضي
وش علي لو قطّعوا لاجلك عروقي
من رضى بالحب .. يرضيه التغاضي

قصيدة وضحى
وضحى لها من طامن الغيم طله
تسقي الكبود بلطفها مثل الازهار
وضحى خذت من حارق القيظ كله
مدري سحاب كفوفها مدري انهار
وضـحـى لها زين المخـاليق كـلـّـه
ايـضــا.. وفـوق الزيـن حـشـمـه ومـقـدا ر
وضحى الحمود لسيف الامجاد سله
حبلت بها صرخه وتعزى لبتار
أحــبـهـا ما يـكــفي ا لوصـف كـلـه
تبقى الحـروف حـروف وأشـعاري أشـعـار
قصيدة نور الصبايا
عـذب الشـفايا .. معـسل الـريـق مـاذيـق
نجـل العــيـون .. معـذب القـلب بالشوق
نور الصبايا .. شـوف رسـمه تـشافـيق
متعـب .. لعـوب .. وظايـم الضـد بـرفوق
يبهج شـبابه عـثـرته للعشاشـيـق
يضحك .. وأنا قلـبي من الصـد محروق
لا .. يا ذهـب .. ومـخـبّـىٍ بـالصـناديـق
لا له ثـمن يشـرى .. ولا هـوب مسـروق
مثل الثريا نـوف .. مالك تلاحـيق
ومضـوي شعاعـك في سما كل مخلوق
ملكـتـنـي .. وأدمى هـواك الـمعـالـيـق
وأنا .. مليـك بجرحه قـول معـتـوق
__________________
ريشتي .. لا تتكلم عن شخصيتي .. لكنها
روحٌ أحست بمعانات أشخاص ..
فعانقتهم

تحياتي
...

[عُروب]

لله درك ياعبودي
اللي جهزتها للطرح
طرحتها ياخوك..في ذا الملف
رائع رائع
جداً..جداً
ذائقه شعريه...جميله
اضاءت بها سماء القسم

[محمد اليحيى]

شكراً عبودي على المجهود الأكثر من رااااائع
بوركت يمينك أخي وفقك الله

[شامخة]

الله يعين الروح .. كم هي تمنى
شوف الحبايب ساعةٍ عقب حرمان
والله يجازي اللي بلطفه هدنا
وقتٍِ تبدل وأبدل الوصل هجران
أقفى ربيع الحب .. وأدهر وطنا
وشوك الثرى دسناه في درب الأحزان

روعـــــه من روائع الشاعر بدر ابن عبد المحسن

يسلموووووووو اخوي عبودي

يعطيك العافية

[وشاح العز]

مشكور على القصايد الجميلة
دمت لنا متألقا