تغريدة
بيت الشعر دارت عــليه المقـــــادير
نوعين كل قام يشكي خـــويه
يقول الأول منزلي بالعثامير
منازلي ماهي عليكم خفية
تشوف زولي من بعيد المسايير
ويفرح بشوفي قلب راع المطيه
ملفا ليا مروا عسوس ومداوير
واللي حداه الجوع يلفي عليه
وانته جديد ولحمو..لك مواصير
حيث ماجالك عزوم قوية
وسط الفلل ماشيدتك الغنادير
يبنيك هندي عضوده رديه
محبوس حتى لو حصل فيك تطوير
وانا أتنقل بالفياض العذيه
تجهل بحالات السلف والمظاهير
واليوم أنا سجلت ضدك قضيه
قال الجديد الله يمسيك بالخير
تراى أنا أفضل منك ميه بميه
أنته مضى لك دور مافيك تقصير
مشاكلك تزود عني شويه
تخاف لاهبت عليك المعاصير
القابلة تذوق فيها المنية
وإن ذعذعت تكفخ كما يكفخ الطير
ويلك ليا هلت عليك برديه
وأنا مكاني بين فله وتسوير
ماشيدوني بالديار الخليه
مرتاح لي عند اكثر الناس تقدير
وحطوا لي مكيف يبرد عليه
ومفروش في زل سواة النواوير
والحمد للمولى حياتي هنية
يوم إن كل جاب وضعه بتعبير
تسامحوا والكل صافح خويه
المصدر/مجلة
التعليق