alardha blog bannar

**عبودي اللغبي** · 11-09-2007, 07:03 AM

الأربعين قصيدة

ادري ان الوقت يذهب ما يعود
اربعينٍ فارقتني يالعنود
ماطر الايام من غيم الزمان
ما يبل الريق لو مهما يجود
كم شربته صافيٍ بارد قراح
ما دريت ان الظما سر الوجود
كل شمسٍ تلمس اشجار العمر
تحرق الاوراق وتجف الفنود
وكل ريحٍ تدفع شراع العمر
ينقطع به حبل ويميل العمود
اربعين مرت وتوني صغير
انتظر لعل تصدق لي الوعود
والغريب اني على هذا مغبوط
ادري اني بخير لا شفت الحسود
الزمن يا بنيتي كله زوال
ما تخلد كود لحظات السجود
---------
تغريد قصيدة

ياللي خذا شعره من الطير تغريد
ومن مدلهم الغيث صافيه لا جاد
ومن كل روضٍ عله السيل ترديد
ريح الزهر ومداعب الريح الأفناد
ومن كل صبحٍ بدد الليل تبديد
دفا الشعاع وفرحة النور لاباد
جاني قصيدك مثل عقدٍ على جيد
الجادل اللي كلها زين وعناد
ما هي من اللي يدلهون المواعيد
حشا ولا هي في الهوي صيد من صاد
وتلفتت روحي لحسنا من الغيد
واشتب في قلبي من الشوق وقاد
ولمست قلبي لين كله تجاعيد
شاب الهوى يا ليت ما فات ميعاد
يا بو حمد ما عادلي في الهوى سيد
وغيره فلا والله ما نقبل اسياد
وين الذي وصله على العين تسهيد
( ولا ودي اقطع درب لاماك برقاد )
يابوحمد وين وصلتنا التناهيد
ضاع العمر ما بين قرطاس وامداد
وانا احسب الشعر صعب المواريد
ماهو غديرٍ ينضحه كل قصاد
يوم امتلا هالجو حشو ومفاريد
راع الجمل معذور لو كسر إشداد
---------
تالي نهار قصيدة

تالي نهار وعاتق الشمس مذبوح
والوقت لو تدرين للوقت ذباح
كن السما صوتً من الذعر مبحوح
والليل خيلٍ سود للضي تجتاح
وسحايبٍ فوق الشفق كنها قروح
على جبينٍ ما شكى كثر ما طاح
لاذت عصافير المسا في ذرا الدوح
وتنفس سراج الوهن بين الألواح
حبيبتي ضاق الفضى وين باروح
وان رحت ظلم النفس للنفس ما راح
مجروح ماهو هم لو قلت مجروح
يالله عسى ما اصير في قلبك جراح
تبسمي برقٍ على ثغرك يلوح
بشد له مدام في العمر مـرواح
غزيت وجه الصبح من غير مصلوح
وانكفت دون الشمس هقوات ورماح
---------
يسعد صباحك قصيدة

يسعد صباحك .. ليلنا تو ماجا
الشمس غابت واشرقت عندكم شمس
هى شمسنا اللي في جبينك تلاجا
والا قمرنا اللي فقدناه من امس
ليل السما برد وسحاب وعجاجا
يامن يشب النور في الخاطر العمس
انتى وانا لو كان منا نتناجــا
لاماطفت في خاطري شمعه الهمس
ياللى جرحتك مالجرحي علاجا
ادري الجروح النازفه تكره .. اللمس
بقول احبك وان عقدتى الحجاجا
لا قولها ثنتين واربع مع خمس
ويسعد صباحك يابعد كل ماجا
وماراح من عمري وانا في رجا الشمس
---------
بالي قصيدة

لا تدعك القلب ترجي يظهر المارد
ويقول لبيك عبدك باح مكنونه
قنديلك اللي انطفى ليل الشتا البارد
سيان عنده وفيت او توك تخونه
ترجّل الفارس اللي لاجله تطارد
يازين شلفاك ملت تطعن طعونه
كل ماحداك الضما جيت الضما وارد
كنك تعاف القراح وتشرب عيونه
شاب العتب وانقطع ما بينناالوارد
ولولا الندم ما غرس فـ ابهامه سنونه
والحزن سيف على ارقاب الفرح جارد
وكل بسمةٍ في ديون الصبر مرهونه
إن صادفك في طريقك بالي الشارد
قله يموت الهوى .. باعيش انا بدونه

**عبودي اللغبي** · 11-09-2007, 07:10 AM

أنا النخيل قصيدة

بين القلم وأصابعي والورق شوق
عشرين حولٍ .. من كتبت القصايد
من يوم بان القلب .. واخفيت بالموق
دمع .. وغـدالي بالمحبه .. وعايد
كتبت ما كني على الشعر مسبوق
وقريت ماكن افـ قصيدي .. جدايد
ونزفت لين اتعبت لا حصل اعروق
وسهرت لين امست نجومي قلايد
وصرت الليالي بين عاشق ومعشوق
وصرت الوصل مابين حاضر وبايد
أنا النخيل وشعري اظلال وعذوق
وانا السحاب اللي على الناس جايد
وفـ ليلةِ حسيت من جرحي اعقوق
وقف النزيف وما بذي له عوايد
صار الورق مابين مهمل ومشقوق
وحار القلم ما بين ناقص و زايد
من الشعر مليت ياحادي النوق
و من الجروح اللي .. تمل الضمايد
و من الحروف ونقصها مع هل السوق
وكذب الحسود .. وهم راعي المكايد
ومجاد لي في كل ساذج ومطروق
وخوفي على غر المعاني الفرايد
عشر السنين وعشر .. والجوف محروق
ما غير أشب أطراف ليلي وقايد
مانيب ادور من ورى نزفي احقوق
و لا ابي من سهر عيني فوايد
لو ما بقالي في الملا غير مخلوق
لا من ذكر شعري .. جفته الوسايد
كني بجبين الشمس .. والليل مفروق
وكني بدمعٍ .. فوق خده نضايد
افداه عمرى .. ماشكى صاحبه عوق
لاشك ما في النفس لو قيل كايد
---------
جفن الليل قصيدة

يطيح جفن الليل واهز كتفه
نجمٍ يشع وباقي الليل مطفي
واحاكي الجدران عن وصف غرفه
ماتشبه الجدران ويطول وصفي
وتملني الجدران واظهر لشرفه
تحت السما واسكر الباب خلفي
ريحٍ تهب وتسكن العظم رجفه
وتموت ريح وتسكن اوراق نزفي
على الروابي تهطل دموع وطفه
وتصب لمع بروقها وسط طرفي
ياطاري الغدران والعمر رشفه
مع قلها ياليتها يوم تصفي
الحب واجد مير الاقدار صلفه
والأرض واجد لكن الحلم منفى
واللي اعرفه راح ماعاد اعرفه
ولاظن يذكرني الى أقبلت مقفي
ماهو حبيبي مورد القلب حتفه
ولا هو حبيبي يفرح بوقت ضعفي
مر ثمر هالليل وأمر قطفه
يالحنظل اللي قمت اذوقه بكفي
متى الشوارع تجمع اثنين صدفه
لا صار شباك المواعيد مجفي
يابنت تو الليل ماراح نصفه
وياليل بعض اللي مضى منك يكفي
---------
بسمة الضي قصيدة

أنا حبيبي بسمته تخجل الضي
يكسف سنا بدر الدجى من جبينه
راعي العيون الناعسه رمشها فّي
وإن سلهمت ذاب الحشا من حنينه
له نظرةِِ لا هي سَرابٍ ولا مَيّ
راعي الهوى تفنى وراها سنينه
نور الصبايا .. بسمة الدّار والحيّ
نوره ولا شمس الضحى تستبينه
دامه معي أغلى الحبايب فأنا حّي
بالقلب أضمّه يوم قلبي ضنينه
له في ضميري من لهيب الوله كي
روحي معه عذب المناجى رهينه
ياصاحبي لا تنشد الروح عن شيّ
أنا حبيبي .. نور كل المدينه
---------
بحر العيون قصيدة

تقول اللي طرف عينك أنا مدري هدب أو عود
أحس اني من اللي صابها ماشوف قدامي
ضحكت .. وقلت لاتخافي على بحر العيون السود
على شط الكحل مريت .. وهذا موضع أقدامي
أدوّر عن ذهب عمري .. أدور كنزي المفقود
وأشوف الموج يطوي الموج ويبحر مركب أحلامي
عيوني بسمة اعيونك ولو صارت مطر ورعود
أبا اشرب من ظما دمعك وابااغسل جرحي الدامي
عطيني عيونك الليلة .. وباكر ياعساه صدود
أمانه لا مسحتي الكحل خلي طيف أحلامي
أحبك كان يكفي الحب جروحي في هواك شهود
أنا اللي راس مالي حلم .. وهم الدنيا قدامي
---------

**عبودي اللغبي** · 11-09-2007, 07:16 AM

تعبت اسافر قصيدة

تعبت أسافر في عروقي ومليت
من جلدي اللي لو عصيته غصبني
ياما تجاوزت الجسد واستقليت
عن الألم .. لاشك جرحي غلبني
أنا سجين الحال .. مهما تسليت
وانا الطليق وكل شيٍٍ قضبني
حريتي لاعل .. يا كود ياليت
اما شفت حيٍٍ جاد لي ماسلبني
وليت يا ليل التباريح وليت
اما محاني الحزن والاكتبني
كل السما في دفتري وان تجليت
مثل الشموس .. غبار قبري حجبني
لي صاحب وان ما تخلى تخليت
لا بد ما نهدم .. ولا بد نبني
---------
أبي النسيان قصيدة
تذكرتك .. وأبي النسيان ألايا خل ساعدني
أنا مالي ورى الذكرى .. إلى مات الأمل خيره
أنا ودي على الفرقا حبيبي لو تعاهدني
وإلى شفتك .. تصد ولاتجيب لما مضى سيره
تخيّر غير هذي الأرض .. مكانٍ به تواعدني
تخيّر لك مكانٍ صعب .. أعرف فيوم تقديره
عسى الجرح الذي يدينك أشوفه عنك يبعدني
أنا اللي أكرهك .. وأحبك .. شعورٍ صعب تفسيره
حسيبك .. يالهوى الظالم .. حسيبك لاتعاندني
بيلقى صاحبي غيري وأباالقى في العرب غيره
---------
أجمل الحزن قصيدة
يا اجمل الحزن .. لدموعك سلام
من حبيبٍ ... بقى منه الكلام
وين انا منك .. غربني الزمان
وخانني النور ... وابعدني الظلام
لو بعزيك ... سالت دمعتي
تدري الدمع في حبك ... حرام
لو بواسيك ... مايكفي الهوى
ولو أبي ... عذر مايكفي الغرام
أعطنى من عذابك يا البعيد
صرخةٍ ... تجعل ظلوعي حطام
آه ...لو في يدي أبكي معاك
قطرةٍ مادرى عنها الغمام
ماابخل الوقت ... يحرمني البكا
وانت لجلك حرمني الإبتسام
يا اطهر الحزن ... لو كان القصيد
يكشف الغم عن بدر التمام
لكتب الشمس شعرٍ في سناك
وامحي إمن السما...عج وكتام
ياعسي البدر نوره مايغيب
عن حبيبٍ بقي منه الكلام

**عبودي اللغبي** · 11-09-2007, 07:26 AM

أبها قصيدة

كل ما كتبت أبها .. نشت فوق الأوراق
سحابةٍ .. وابتل في الصدر معلوق
أخيل بين أصابعي .. نوض براق
وكن القمر ينبت له غصون .. وعروق
شقت ثياب الليل .. عن جلد الأشفاق
لا بان لي معنى0 .. ولا زانت طروق
ضاع القصيد00وما بقى غير الأشواق
وأحلى الشعر ما يكتب الشوق في الشوق
إن خان بي الشاعر .. فأنا جيت عشاق
وكل عاشق لا بد ما يطلب حقوق
يا سودة أبها .. خاشري كل شعاق
كبد السما لا شك لدي لي بموق
إن كان أبو بندر على الوصل سباق
لي الفخر .. إني من الشيخ مسبوق
لأجلك عسير .. أزعلت خلاني فراق
جيتك .. ودونك أشهب القاع مشقوق
لي ديرةٍ خدانها مثل الآفاق
فاطرافها .. وديان .. وجبال .. وعروق
وحّد ما بين ترابها .. دين وأخلاق
وفرّق شمل عدوانها .. كفر وعقوق
---------
الله اقوى قصيدة
الله أقوى غدا شوفك سراب
كيف أبا أروي حنيني .. بالظما
يا ممنى حياتي .. بالسحاب
وين غيث المحبه .. ما هما
اجدبت بالحشا أرض العذاب
واشتكت من تجافيك السما
كيف ترضى عليّ .. طول الغياب
وانت حبك جرى مجرى الدما
يا حبيبي ذوى قلبي وذاب
من عذابــه وبيح ما كما
وعل عينٍ .. رضت فيك العتاب
تشتكي بعد نوره مـ العمَا
---------
اقول أحبك قصيدة
قالوا حروفي عمي وعيونك بروق
مافي قصيدي جنح ليلٍ وبارق
قلت الذي له داخل ضلوعي حروق
أقرب من اللي في سما الناس شارق
غيري يشوفك وأجود الشعر مطروق
وأنا أحسـّك وأصدق الحب فارق
ياللي عيونك دم وعيونك عروق
ولهاث قلبٍ فـي نواعسك غارق
أقول أحبك يخرج البحر صندوق
تبرالغزاة وكنز سود البيارق
وأقول أحبك صدرالايام مشقوق
عن وجه غرناطه وعن مهر طارق
وأقول أحبك والله إني من الشوق
ألقا طيوفك في جميع المفارق
كتبت لك قلبٍ من القلب مسروق
ولا طاب لي وصفٍ من الوصف سارق
---------
الخل العنيد قصيدة

تل قلبي .. تل طيرٍ على طلعٍ وكيد
جود المقرود سبقه وعيا يطلقه
يوم فاع اركى جناحه على قاسي الحديد
وانكسر ريش النداوي ولا الله وفقه
يكفخ القلب المشقي على الخل العنيد
ما وفا بالعهد لا شك قلبي صدقه
واهني اللي على الحول ينبت له جديد
وش سواة اللي جناحين قلبه محرقه
يا لطيف الروح وبحق خلاق العبيد
اكرم المملوك بالوصل والا فاعتقه
---------
إنشد البحار قصيدة

جاءت هذه القصيدة بمناسبة زيارته للبحرين لأحياء أمسية شعرية هناك:

أنشد البحار على سر الحنين
عن قصيد البحر .. وجروح السفين
عن حبال الشوق تظمأ للشطوط
عن حروق الملح في شفاه السنين
ما عرفت الغوص في اليم المخيف
ولا رهنت العمر في الدر الثمين
جيت أنا من نجد .. في قلبي الرياض
وفي عروقي التهم .. والبيت الأمين
في كفوفي تصرم نخيل الحسا
ومن ذواري الرمل غادي لي جبين
جيتكم .. والعشق يطرحني سؤال
هو صحيح الشط له صدر ويدين
عانقتني بيوتكم .. وأنا بعيد
ما عبرت الجسر .. ما شفت القطين
ياهوى البحرين مريت الديار
عابرٍ والقلب باللهفة ضنين
لين حطت بي رحالي في هواك
وانبعث نبع المحبة في الكنين
---------
حلم قصيدة
أطوي الجديلة في كفوفي .. وهي ليل
ولا من طويت اليل .. صار الجديله
حلمٍ جمعني فيك .. ما كان بالحيل
حلمٍ ولكن .. شوفتي لك قليله
ناديت لك لين إسمعتني المواصيل
واشتقت لك .. كن العمر صار ليله
ولمستك بروحي .. وكانت قناديل
أصابعي .. والقلب نار.. وفتيله
ما هو غريب .. أبتل من جارف السيل
لا شك ينبت في عروقي خميله

**عبودي اللغبي** · 11-09-2007, 07:31 AM

انفاس قصيدة
يازين مافي العيون نعاس
والقلب مشغول بهمومه
اما معي نطرد الهوجاس
والا لك النوم وحلومه
هذي نجوم السما .. جلاس
وعيبٍ على العاشق القومه
لاجل الهوى عذبونا الناس
ومن بيح السد ما الومه
انفاسنا ماغدت انفاس
من حرها دوم مكتومه
---------
انا الجفا قصيدة
عن كل نجم ظهر بسدل أجفاني
لعل ما عيش حزني لحظة غروبه
وعن كل خلٍِ طويل الصمت كفاني
الصاحب اللي قليل الهرج عذروبه
وعن كل ثوبٍ جديد باالبس أكفاني
وأدله ولا ألقى رسايل هم في جيوبه
أنا الجفا ليه أخاف الناس تجفاني
وأنا الحبيب الذي من يعشق عيوبه
راعي الوعد وأن صدق مرة ولاقاني
يحتار بين السراب وقلب محبوبه
يامن عذابه يشققني ويرفاني
فرقاك غصب علي بالحيل مكتوبه
خبرت نصف تعب من نصفه الثاني
بعضي الرماد وبعضي نار مشبوبه
---------
البتول قصيدة

كـل أرضٍ تشيلك يـا ثـقيـل الحمــول
وكل وقتٍ كريمٍ بالرضا والزعل
وين مـارحت تلقى لك حبيب وعـذول
وين ما كنت تلقى مثل ياسـك..أمل
ياطـريق الترجي والوله والـنـحول
والله إني مـشيـتـك... لـين حد الـثـمل
مالقيت فوصولي لغـير قــبري وصول
ولا عـرفت فـحياتي مثل عرفي الجهـل
لا تظـن المـسافر مـن يسوق الـرحول
مـن وقف دون حلمه عاجزٍ ما رحـل
وما لمخلوق منجا في الحذر والجـفول
مـا تـصيب السـهام ولا يـطـيـش الاجــل
الـلـيـالي خـــــوات.. مــير مـنـهـي البـتــــول
والحــوادث عـشــــايـر مـير ويــن الفـحـل
ليلةٍ لـك .. وليله بـالفـــرح مــا تـطـــــــول
ولـيـلـةٍ مـن شــهــدهــا ذب راس الــجبـــل
أتذكّر في عين الشمس طفــلٍ خـجـــول
شـالـتـه فــي هــدبــهــا وقـت لــين إشـتـعــل
أعجب الناس وهجـــه بالجــدل والفـضــــول
ما دروا عن (جمـــال الجـرح) لــين إنـدمــل
والله اني كتـبـتـه في العطــش والذبـــــول
لــين غــصــنــه تــعـــدل بـالــورق وإعـتــدل
والله إنـي كــتـبـتـه لــــين قـــــــال الجـهــــــول
والله إنـي كـتـبـتـه وانــتــشـى واحـتـفــل
ما أتفه الشعر كانه هالحكي اللي نقول
لا تـعـدى الــمــــديــح ولا تـعــدى الـغـزل
إن لثمت الزهــــــور وصــــاحبتني الحقــــول
مـاهقيت ان صافـي الشهـد عيب النحل
مابقى في ضلـوعي كود ريـح مـعـمــــول
وثــــوب شـاشٍ عـليه مــن النــدامـه وحــل
ألـتـفـت للـطــــريــــق ومــا عـــبر مــنــه زول
فـــي جـفــوني تـزاحم عبرتي والـوجــل
طـلـت يالعـمر والا قــلــعـتـك لا تـطـــــــول
طــاولــتـنــا الـلـيــالي بالـســــهــر والــمــــلـل
إن تـعـبـنــــا نـــحـب ولا لــقــيــنــا قـبـــــــــول
مـا تــسـر الامـــانـي .. ولا يـفيـد الـعــذل
لكن .. الله كريم وكل همٍ يزول
مـا على الله بعيد .. ولا جـفـاك الـمـحـل
كـل أرضٍ تشيلك .. يـا ثـقيـل الحمــول
وكل وقتٍ كريمٍ بالرضا والزعل
---------
اغفر لي الزله قصيدة
أبيك في كلمةٍ لو هي خطا تغفـر لي الزله
وردتك ظاميٍ وان عز وصـلك بااقطع حبالي
أحبك ذا ترى أول كلامي .. وآخره كله
ولكن وش يضر اليـوم لو تدري عن احوالي
وخذ ما جـاز لك من هالحكـي واللي تبي خلـه
انا لا قلت ما في خاطري والله ما بالي
ظلال العاشق جروحه ومن ما يتبعه ظله
أمانة يا شعاع الشمس لا تغضب من ظلالي
وتقـدر تطـوي الدرب البعيد وتقـدر تفـّله
ولكن صعب تمنع في الهـوى صبري وترحالي
وتقـدر تغمد السيـف الرهيف وتقـدر تسلّه
ولكن عـند خلاّق البرية علم الأجالي
متى عمرك سمعت بعاشق قد مات من غلّه
هذاك الحاسد وراعي الهوى تتلفه الأمالي
حبيبي من يعـزك في الهوى ما تقدر تذله
ترى قربك يزيدك بالغلا وان عفتني غالي
---------

**عبودي اللغبي** · 11-09-2007, 07:37 AM

انتي المزين قصيدة

شبي الونس واملي الهبايب بالاصوات
وعدي ضواري وحشتي عن ضلوعي
روحي خلا .. سكانها خوف وسكات
وليلٍ ملا قلبي .. ظلامه يروعي
ما هوب صدري .. ذي مداهيل الآهات
وماهوب جفني .. ذي مقابر دموعي
حبيبتي وان قلتها بعض الأوقات
من عزتي .. ماهي ترى من خضوعي
أهواك لي فوق الشواهيق رايات
وعلى حصون الياس تزحف جموعي
واهواك ورقاب المغلين محنات
واننتي المزين تنتخيني فروعي
واهواك مراتٍ .. واعاتبك مرات
بالله .. لا تبكين بردي وجوعي
إن طحت فـ اطوي الياس من حب الأموات
هذا رحيلي عنك.. واتلى رجوعي
---------

الله يحبك قصيدة

الى صاحبة السمو الملكي الأميرة
البندري بنت عبدالعزيز بن عبدالرحمن آل سعود
الله يحبك كثر ما شقّق البرق
سود الدياجي وانبت الغيث وارق
والله يثيبك كثر ما بان من شرق
نجمٍٍ وغاب فـ لجة الغرب شارق
ياسدرةٍ في نجد يلقى بها الورْق
للنوح غصن وللمعالي بيارق
لك الشموخ لباس.. عاليك للعِرق
وباقي النساء خرص الذهب والعشارق
والله ما مثلك كتم آهة الحرق
وما كن مسّك من لياليه حارق
وقتٍ إلى منه كسر رمحه الزرق
بالنار يودع في الحنايا مطارق
ياهيه حوّل مثل ما تشتهي وإرق
وإفطن لقبرك بين هاك المفارق
الوقت يسرق باقي أعمارنا سرق
ما نجتمع .. إلا وحنا نفارق
ياعمتي بعض العزا يتعب الطرق
ما ينكتب والحرف بالدمع غارق
كل شكى لوعة لياليه والفرق
في اللي يبي ما عند رب المشارق

**عبودي اللغبي** · 11-09-2007, 07:42 AM

شديد الرمل قصيدة

ليلة شديد الرمل .. جتنا ركايب
من الشمال .. وبركت بين الأيام
طوي التراب وشل فوق النجايب
والجو ثارت به معاصير وعسام
علمي بوجهك فـ اسود العج غايب
والريح تدفعني وانا ما لي اقدام
لولا الشجر .. شدت غصونه نهايب
جلدي وثوبك قلت انا وانت الاوهام
لا خيمة .. لا طنب لا صوت شايب
لا صرخة ..لا طفل لا كحل وزمام
طاح الرواق وطاح حلم الحبايب
لا ناي في روحي غدت روحي حطام
ما غيرها ضـلوعي في صدري حطايب
وشم الجروح اللي بكبدي من العام
إن كان ذا قبري فـ ابي له نصايب
قبر الورق خلوا شواهده الاقلام
يامعمر الدنيا عمارك خرايب
ما حدٍ ورث جدرانها غير الأيام
العمر شدة والليالي ركايب
والرمل يمحي الرمل والموت قدام
---------

شمس الورق قصيدة

أنابظهر من سكوتي قبل شمس الورق ما تغيب
قبل حبر الليالي يجف .. وانا ماغنت جروحي
قصيده .. خذتها من طفل .. ما اظنه ابد بيشيب
ولكنه نزح عني .. مثل إحساسي بروحي
ابا اكتب للسماء نجمه.. ابا اكتب للخزامى طيب
واباكتب لين احس القلب لا يكتب ولا يوحي
يموت في قلبي الشاعر ويغتال المشاعر ذيب
ولا ادري افزع للضحكي .. او أحمي صرختي ونوحي
حزينه هالقوافي لا .. ولكن من يعرف الغيب
سعيده هالقوافي .. بــ انتظر لين آخرة بوحي
تعالي نتيع الضي البعيد في عتمة التغريب
ولو مليتي من أجمل قصايد غربتي روحي
---------
رسالة من بدوي قصيدة

يا بنت أنا للشمس في جلدي حروق
وعـلى سموم القيظ تزهر حياتي
أطرد سراب اللال في مرتع النوق
ومن الظما يجرح لساني لهاتي
عاري جسد والليل هتّان وبروق
دفاي أنا والبرد سمل العباتي
إن عذربوني بعض خلانك .. صدوق
يا بنت أنا عشق الخلا من صفاتي
وشمٍ على رمال( المتاييه) مدقوق
لاشك من منهم يسوي سواتي
أنا بدوي .. ثوبي علىالمتن مشقوق
ومثل الجبال السمر صبري ثباتي
ومثل النخيل خلقت أنا و هامتي فوق
ما عتدت أنا احني قامتي إلا فصلاتي
وإلىإفتخر بأفعال يمناه مخلوق
يا بنت انا فعلي شهوده اعداتي
الله خلقني وكلمة الحق بوفوق
وملكت الأرض .. ( وراس مالي .. عاصاتي )
---------
ذليل الدمع قصيدة

أنا لانيب لاشاكي .. ولاعتاب كفاني اشطون
هواك اللي نثرته لاتعجب لاأنكسر كاسه
ترى ما يذبح العاشق مثل دمعٍ بكته اعيون
على موت الأمل واللي يحبه هو سبب ياسه
حبيبي ما خبرت الدمع يرقا وجنة المشطون
ذليل الدمع .. لابد يتحدر لو رفع راسه
بقالي عزتي ياللي على اللي ما سواها تمون
وأظنك ما سمعت بعاشقٍ قلبه عصى وداسه
أنا الحطاب في قاعٍ جرد ما به شمع وغصون
حداه البرد والليل الطويل وشب فاسه
---------
زلة المحبوب قصيدة

يا زين .. للعاشقين ذنوب
كثير واللي يحب يغفر
بالحيل .. طول الزعل عذروب
إلى متى الكسر ما يجبر
با أخطي .. وأعيد الخطا وأتوب
والصاحب .. اللي علي يصبر
وإن ما دمح زلتك محبوب
ما أظن من يكرهك .. يعذر
---------
زل الطرب قصيدة
تلعب وانا .. ما عاد لي بالطرب شف
لعبك بروحي بدل الفرح بجراح
زل الطرب يا موجع الطار بالكف
شابت قوافي الليل .. نور الضحى لاح
كانك تدق القلب .. دقك على الدف
عسى الضلوع توقي القلب لا طاح
شفتك .. ولا ادري من قضب بعدك الصف
ناس ٍ كثير .. وكنهم عندي أشباح
نورك دعاني عندك الشوف وقف
كنه فنارٍٍٍ لاح في عين ملاح
من له ثمان اسنين من راح منكف
خلّى السفين وعارض الموج سباح
من فرحته ما حسب االحيل يتلف
غلب عليه الموج والقاع منزاح
---------
شكرا سحايب قصيدة

شكرا سحايب على لطفك
انتي مطر والصحاري الناس
قلبك شكا من كثر عطفك
لا باس هذا التعب لاباس
أغليك وان كنت ما عرفك
اخوين يجمعهم الاحساس
رسمك لحن رائع وعزتك
على القلم نوَّرالقرطاس
---------

**عبودي اللغبي** · 11-09-2007, 07:49 AM

دروبي رمل قصيدة

في دروبي رمل لامن جيت ساري
ينبت الأشواك لامن رحت ساري
صاحبي ماجيتك إلا وفي طريقي
من ربيع العام نوّار وخباري
ولا تواعدنا وبه في الأرض زهره
ولا تفارقنا وبه للبرق طاري
لا تأخر دام لي في العمر ساعه
ولا تقدم لين أشوفك في انتظاري
الزمن ورده .. سهرت أحسب ورقها
وإن قضا ماجيت في دموعي عـواري
حبـّني كثـر اللـذي نلقـى بوعـدنا
من ظلال وريح ونجوم وغـداري
صاحبي مثل الخجل لو تكتسي بي
قبل أصير الشال يذهلني انحساري
ياقريب البعد .. للشكوى أسامي
الجفـا .. والخوف .. وآخرها حذاري
وانت لو خان الزمن بقول وافي
لا أنا تركي .. ولا أظنك مشاري
---------
سافري قصيدة

سافري كان يرضيك السفر
جربي لو ورى ليلي صباح
بدلي الرمل بأمواج البحر
واتبعي الغيم تحملك الرياح
سافري لين تبكين المطر
واضحكي لين ما يضيق البراح
ولا تعبتي وحسيتي بضجر
خلي الشوق لديارك جناح
أرجعي في ابتساماتك عذر
مثل ما الدمع في عيني سماح
انتي العين من طول النظر
وانتي القلب من كثر الجراح
---------
الروح الجريحه قصيدة
يا عذولي .. وش تفيد به النصيحه
لا تعذل القلب .. وجروحه طريّه
من يداوي علة الروح الجريحه
ومن يسلي دمعة العين الشقيه
ان شكيت من الهوى .. قالوا فضيحه
وان سكت استنقضوا جرحي عليه
وان نويت البعد .. ضاقت بي الفسيحه
وان بغيت القرب .. خان القرب فيه
من عذلني في الهوى الله يبيحه
ومن عذرني .. ما حصل مني خطيه
---------
الشفق قصيدة
أول اليوم عانقت الشفق
وآخر اليوم عانقني شفق
وأنا بين التلاقي والفراق
أدفن العمر وأحفر لي نفق
يا حبيبي وأنا مثلك غريب
عن حمى النوم غربني أرق
اقطع الليل لديار النهار
واغسل الدمع من شط العرق
ولا جمعني بك الموعد لمحت
ألف نجمٍ توهج .. واحترق
أجمل العمر طفلٍ من غلاه
قمت أضمه لصدري واختنق
وباقي العمر لو عمره يطول
ما يجي سطر في ذهن الورق
من بقول اللقا غير الوداع
بينهم فرق واجد ما صدق
أول اليوم عانقت الشفق
وآخر اليوم عانقني شفق

**عبودي اللغبي** · 11-09-2007, 07:54 AM

قصيدة دارالشواق

يا الله لا تقطع رجا كل مشتاق

بامرك يا رب الحلم يصبح حقيقه

وأنا أدري أن الوصل تاليه لفراق
ولولا الأمل .. ما تحمل النفس ضيقه
أمس سرى في تالي الليل براق
قلبي يفز لنوضته بتخفيقه
وسمٍ بكور صادق الوبل دفاق
لو شافه الظميان يبتل ريقه
عله على دار الوفا .. دار الأشواق
دار صفت لأهل القلوب الرقيقه
فارقتهم ما ليلةٍ خاطري ضاق
واليوم للسلوان ما أجد طريقه
يا كود حرفٍ لي كتبته بالأوراق
مثل السراب اللي يسلي بريقه
والله لو كل المخاليق عشاق
ما شفت لك نفسٍ تعذب دقيقه
---------
قصيدة شكرا صدقت
لو كـان في كفي رميته في كفك
يفـداك مافي الحب من صـادق الحب
تـحبنّي؟..ياعلّني بعض ضـعفك
قلبي جـرادٍ باد مـا حصـّل العشب
أنا قـديم الـهم وأنفـع لعطفك
أما الـهـوى ياسـيدي مركبه صعب
يا ليت لي صهوة جوادٍ وأخطفك
للشمس لنجـوم المجـرات.. للشـهب
تحبني..وأقـول من زود لـطفك
شكراً صدقت .. وألف شكراً على الكذب
---------

قصيدة السراب

قال السراب وقلت ظامي لسـرابه قال الهلاك وقلت لعيون الاحباب
يا لايمي في حب متـرف شـبابه الموت حق ولاتبـرق بالاسباب
كانه ذبحني صـاحبي من عـذابه ماابي لدمي يا هل اللـوم طلاب
الـجادل اللي فيه زيـن ومهابه يفز له قلبٍ .. وتخضع له أرقاب
في حجر عينة لي غديـر وسحابه وفي وسط قلبي له تناهيت وعتاب
إن قلت أحبه يكفي القلب مـابه وان قلت أنا مابيه ..باصير كذاب
---------

قصيدة دم الاطراف

أتعب على المعنى .. ويسهرني القاف
ويلذ لي تجريح عذب القوافي
وإلى مزج حبر القلم دم الأطراف
يصير لي معنى على الناس خافي
عندي معاني الشعر تلمس وتنشاف
أنما جرحك الشعر ما هو ب كافي
وان ما لمس في القلب .. احساس وشغاف
عدّك كتبته فوق رمل السوافي
لاتحسب ان البحر موج ومجداف
ترى قليل البحر ما كان طافي
---------
قصيدة شمس الجمال

هيه يا غصن تمايل بالدلال
ما تخاف الكسر لا هب الهبوب
وما تخاف الله وتسعى بالعدال
انصف من لحاظ عينيك القلوب
لا متى ذبح العرب عندك حلال
تابت العالم متى عينك تتوب
مير قلبي يا لغضي بيعه محال
ما أقدر أعطي لو تبي مني ذنوب
أشهد إنك بالحلى فقت الخيال
وعيب حسنك كان في حسنك عيوب
شارقة في طلعتك شمس الجمال
وجامع في ضحكتك كل محبوب
الخمل فيني انا ما بك خمال
مشملٍ نوّك .. وانا نوّي جنوب
---------
قصيدة دمع السحاب

جهّى مطر دمع السحاب المجاهيم
سود العيون اللي انتثر وبلهنه
رمح الشمال اللي طعن مهجة الغيم
شق السحاب وسالت الشمس منه
ساعة غشاني دمعها كنه الديم
دب الوجل في المهجة المرجهنه
وقمت اتذرى بالصبر والتعازيم
بعضي يبوح الخوف وبعضي يكنه
ناديتها واللي يغيث المظاليم
انك ولا غيرك لقلبي مضنه
ان قالوا الحساد داله وانا .. اهيم
ما نيب انا ارجي من عدوي محنه
قالت تشد .. وقلت بالحيل باقيم
ما في الوطن .. وعيون الاحباب منه
تبسمت شوقٍ .. بحبٍ .. بتسليم
حبيبتي .. والا العدو خاب ظنه
---------

**عبودي اللغبي** · 11-09-2007, 08:00 AM

قصيدة سلامة رماحك

سلامة رماحك اللي جرحها غالي
طعنتني

لين أنكسر رمحك
لو قلت لي كان أجرح حالي بحالي
لا عاش قلبٍ جزع وارتاع من جرحك
لاجلك جروحي غدن اليوم عذالي
ذميت ظلمك وأنا من عادتي مدحك
ياليت لي ذنب وألقى علقمك حالي
وياليت بك عدل .. وأرضى فـ الهوى ذبحك
ياسيدي وإن نويت تزيد غربالي
قلي وأنا أبعد ظلامي عن سنا صبحك
لو ما يسرك أطو ل الشمس بجبالي
مايكفي إن عشقت جبالك وسفحك
كل الهوى بالهوى يزهى ويختالي
وأنا الذي في خسارة عزتي ربحك
ياعل ماتزهرالأشجار في رمالي
لو أعتذر عن شموخي في رجا صفحك
سلامة رماحك الي جرحها غالي
طعنتني غاصب لين أنكسررمحك
---------
قصيدة ربيع الحب

الله يعين الروح .. كم هي تمنى
شوف الحبايب ساعةٍ عقب حرمان
والله يجازي اللي بلطفه هدنا
وقتٍِ تبدل وأبدل الوصل هجران
أقفى ربيع الحب .. وأدهر وطنا
وشوك الثرى دسناه في درب الأحزان
خاط القدر بسلوك حكمه كفنا
وإلى حكم وش ياترى بيد الإنسان
حنا ضحايا الياس .. نرجي زمنا
ينظر لنا لو يوم لله بإحسان
حـــنا ليالــينا بــهـــوانا رمنــا
حنا .. جنينا ونرجي الله غفران
---------
قصيدة شاعر

أحبك ..آهـ انا ياليت قلبي .. شعلةٍ من نور
كريمٍ مثل شوق النظرة اللي تسكن أهدابك
أحبك وش بقى مني حطام العاشق المغرور
وما أظن الزمان اللي مضى يرجع من اسبابك
ولكن صدقيني الصدق في هذا الزمان شعور
يحبك من صدقلك مرةِ ما همه عتابك
أمانه لا تصبين العمر في كاسي المكسور
يضيع العمر ما يبقى سوى الإبهام وانيابك
ابد ما هو قصيده كتبهـا لك شاعرٍ مشهور
ٍولا هو وردةٍ يذبل ورقها في داخل كتابك
ولا هو بسمةٍ صفرا على شفاة موات بور
وملامح صورةٍ تخفينها حتى عن اصحابك
الا يا طفلتي ماهو الهوى هالشارع المهجور
ولا هو ريحة غبار الوعد في اسفل ثيابك
كذب من قال ورد العاطفه ينبت بظل السور
وجبان اللي يخاف الناس لو وقف على بابك
كتب لك كل مافي الحب من عذب الكلام سطور
و لكنه عجز يا طفلتي لا يكتب كتابك

**عبودي اللغبي** · 11-09-2007, 08:06 AM

---------

قصيدة ديمه

قلت المـطر . . قالـت من اليـــوم ديمــــه
ما به رعـد . . لا بـرق . . ما غـير هـتان
عشـقٍ جـمع ما بيـن قاعٍ وغـيمه
فـيض على صدر الثـرى دمع الأمزان
هــمس النديم .. الــلي يعـاتب نـد يــمه
صـوت المطـر .. كـنه تعاتـيـب خلان
وتبــسـمــت لا جل الــلــيالي الـقــد يـمـه
وقالـت تــذ كر قـلـت يابـنت نسيان
نـقـض الجـروح الـلي تـشافـت ظـليمــه
ما عاد به وصـلٍ ولا عاد هـجران
ومـا لـلرجا فـي بعض الأحـوال قــيــمه
ومال العـمى صبـحٍ ولو بات سهـران
لــو لــلزمن .. عن نية الغـد ر شـيـمـه
مـا فـــرق أحـبابٍ ولا بعــد أوطان
كلٍ خـصـيم .. وذاق لـوعـة خــصـيـمـه
والـلي خـصـيم الوقـت يا بنـت خـسران
---------

قصيدة زمان الشح

في زمان الشح .. يصبح للقمر
مثل نور الشمس في الليل العتيم
في زمان الشح .. يصبح للحجر
مثل ما للسيف من قدرٍ عظيم
في زمان الشح .. يملانا الفخر
لا تحدى الظلم كهلٍ أو فطيم
في زمان الشح في وقت الدهر
كل مجدٍ فـ ارضنا يولد يتيم
وش نقول اليوم ياطفال القهر
في القصايد ذل والله العظيم
ما فقدنا السمع ولاكف البصر
مير بين اضلوعنا قلبٍ سقيم
أهلنا صرتوا عناوين وصور
انتذكركم مثل وجهٍٍ قديم
كن ما به ارض لا نهر وبحر
كيف جرح الأرض يشفي في الصميم
علمونا اليأس من صبر وحذر
علمونا (القدس) ننسى (اورشليم)
لا سقينا غيث هتاف المطر
كان خضنا الحرب باطفال وحريم
---------

قصيدة سلام
سلام يا رمشٍ كسى باهي الخد
سلام يا ذبح القلوب الخليه
انعم من النسمة على خدة الورد
وأغلى سلامٍ لو ترده عليه
كان الجفا منك حصل لي فلا بد
أرضى بعطفك لوه رد التحيه
رد السلام ولي تبسم على قد
ما توجب ظروف الوفا والحميه
وان كان لك قلبٍ غليلٍ على الصد
الله حسيبك صد .. أنا اش في يديه
والله ما يصبر على خاين الود
كود الذي قد خان أمانة خويه
---------
قصيدة ذلني الشوق

ينزع الحر .. للعالي المنيف
عادة الحر .. لطام يعاف
ذلني الشوق يالقاسي اللطيف
ولحظة الوصل .. من صدك تخاف
انا قلبي .. جناحٍ له رفيف
يتبع الشمس في الريح الصلاف
للوعد جيت من لون الخريف
وللوعد جيت من طعم الجفاف
ومر في ساعتي وقت ونزيف
ومر في خاطري حزن وزفاف
آه وينك انا مثلك كفيف
وليه قمراك تطلع ما تشاف
---------

قصيدة ردي علي الصوت

ردي علي الصوت .. ردي حياتي
صمتك على شكوى حنيني .. مذله
اما اقطعي حبل الوصل بالنجاتي
والا عطيني باقي الود .. كله
لا توعديني .. عذب الصبر ذاتي
والبعد حالي مع عنا الوجد سله
اشكي الجفا لك .. ما شفيتي شكاتي
الوعد الأول للقا .. فات حله
يرضيك يصبح شملنا للشتاتي
يرضيك نرضي كل نفسٍ مغله
يرضيك لا فرحوا بهمي عداتي
واقفوا يقولون .. الغضي عاف خله
ردي علي الصوت .. يكفي السكاتي
قولي لغيرك ماهفا القلب للّه
---------
قصيدة عض النواجذ
أقـوم بجبالٍ ولا أقيم في سفح
لو أطعموا لحمي لعوج المخالب
يابنت مابه ذنب يصعب على الصفح
كود الهوان وعيش سحم الثعالب
لاوالذي كرّم جديلك عن النفح
العز ماهو بين شـاري وجالب
الله خلقنا .. تلفح وجيهينا لفح
حر السمايم في عزيز المطالب
سوى رضينا أوطفح كيلنا طفح
عض النواجذ طبع والطبع غالب
---------

**عبودي اللغبي** · 11-09-2007, 08:12 AM

قصيدة على النوى

على النوى علمي .. بهم هجـعة الليـل
نجل العيون من البكا كحلها سال
واليـــوم غـير اليــاس.. قـــل الـمــراسـيــل
يــا مــن يــطــمـّـني عـسـى لـيـلـهم طــال
الله عـلى اللي مـا صــفط لي غــرابـيـــل
لاشـك شــرع الـحـب همٍ وغربال
قـفّـــى ولي فــي حـجــر عيـنه تعـالـيــــل
تـقـــول يـا ذا الـبـعــد نـجـزيــك بـوصـال
وتــعلــقـت روحي الـلـيــالي الـمقــابيــــل
و يـا عنك مـا يـامـن مـن الـوقـت رجّـال
لا مــا عـلي لــو دمـــع عـيـني همالـيـــل
المـــوت دمـــع القـلـب لا صـار هـمــّال
---------

قصيدة ضيعت الدليل
كل ما أقفيت . . ناداني تعال
وكل ما أقبلت عزّم بالرحيل
وكل ما أجنبت واعدني شمال
يا أهل الحب ضيعت الدليل
الحقيقة غدت مثل الخيال
هو عـدوّي . . وهو أغلى خليل
شفت أنا الظلم من بعض الدلال
يجرح القلب لو كانه جميل
أشهد إن الهوى ما به عـدال
هو خلي . . وأنا قلبي عليل
وكل ما قلت له يا ابن الحلال
المحبة عطا . . وانت بخيل
التفت لي وهو عجل وقال
لذة الحب في الشي القليل
---------
قصيدة طيف
نامت الشمس .. واستيقظ عناي
حال دون الكرى طيفٍ ضوى
ساعة أقبل نطحته من عماي
وصحت يا سيدي .. طال النوى
أحسب إنك معي ليتك معاي
يوم ضميت بيديني الهوى
يا بعيدٍ عليه انزف دماي
لاقضى الصبر .. ولا الشوق ارتوى
نبتة الدم .. تورق في حشاي
من سببها ترى حالي ذوى
وين أنادي ومين يسمع نداي
صرختي فيك .. وسكوتي سوى
---------
قصيدة العمر أحبك

لليل احبك مابقى في السما نور
والى ضواني الليل .. للصبح أحبك
واللحظة اللي كلها عند وغرور
أشوف قبري بين عينك .. وقلبك
في صدري سراجٍٍ حزينٍٍ .. ومكسور
رغم المطر والريح .. شلته في دربك
والله مابه غير لوعاتي قصور
وخوفي عليك الله ربي وربك
ما بي جهد ابني على صمتك جسور
لا حيرتني أسباب سلمك وحربك
العمر أحبك .. مابقى فيني شعور
والى جفاني العمر .. وشلون أحبك
---------
قصيدة صوت العظام

لو هو غضب بيحت ما ضم جوفي
من الغثا واظهرت عقب االعقل جهل
ولو هو الم ما طال عندك وقوفي
ولا جيت أبا اسمع قصة الذيب والحمل
ولو هو ندم كسرت .. باقي سيوفي
على دروب الوصل ومفارق الشمل
صوت العظام اللي تكسر حروفي
مابه كلامٍ تنطقه شفتي سهل
إن جيت امش الدمع تبكي كفوفي
وإن جيت أقول الشهد يوذيني النحل
الحمل ماهو اللي تشيله كتوفي
الموت لا صارت كتوفي هي الحمل
ومن قال باكر .. قلت باكر حتوفي
والباقي إنشد عنه ضراية الرمل

**عبودي اللغبي** · 11-09-2007, 08:18 AM

قصيدة صرخة بلا فم
قالـــت قـصــــيدك ليـل .. ســودٍ مـعـــانـــيـه
رويـانـــــةٍ بالــــدمـــع ... وامـــدادهـــا دم
الى متـــى يـا شـاعـــر الـهـــــم تــخـفـــــيه
والى متـــى .. تحنى ضلوعـــك على هم
قلـــت الــبـــكـــا .. صـعـــبٍ عــليه وأنـــا بيه
لا واهــــني الـــلي بـكــــى ومـــا تـنـــدم
لي عبـرةٍ يلعــــب بهـا الــحــــزن والــــتــــيه
ولي صرخــــةٍ .. واتعبـــت ابـلقــى لها فم
لا مــا كــتـــبــت الــشعـــر .. لـحـدٍ بسليــه
ولانــــيــب مــــداحٍ .. ولا بــاتــــرنــــــم
احـــســــاس لابيــعــه ولانـــيــب شـــاريــه
مـــرٍ يجـــي شـــهـــدٍ ومــــرات عـلــــقم
الى لمحــــتي دم جـــوفــي .. افـــ خــــليه
علــىالورق .. لا صـــار روحــــك تـــالـــــم
قلـــت الـشـــعــر يوم إن لي .. راحـــةٍ فيه
وحـــزين أنــا .. إلـى متـــى .. الله يعـــلم
---------
قصيدة ظامي هوى
ما أقول أنا لبيه .. وما أقول سمّى
ياعيونه اللي ما صفت لي وتكدّرت
يا صاحبي بكفيك مدحي وذمّي
كان الجفا تقصير يا زين قصرت
يا من نثر برماح الأهداب دمي
لو للجروح ضماد وصلٍ تصبّرت
لا شك ما انته يا دعج العين يمّي
لا والذي اطغاك زين وَتكَبّرت
ظامي هوى وشربت من فيض همّي
ويوم ارتوت روحي من الدمع صدرت
---------
قصيدة طير السعد
هذه القصيدة كتبت في رائد الفضاء العربي المسلم الأول.. الأمير سلطان بن سلمان بن عبد العزيز
الطير .. هد وصاد لا خاب راجيه
نسل الحرار اللي هددها فصيله
طير السعد .. من يوم نهض مواميه
لدت له الدنيا .. بعين جليله
هو طيرنا اللي معجبتنا مهاويه
به نفتخر يا أهل الفعول الجميله
سلطان .. ماهو بس فخر لأهاليه
له فرحةٍ في كل أرض وقبيله
الا العدو ما كل شيٍ بيرضيه
يا كود هدم أمجادنا .. والفشيله
لاشك ماله عندنا غير نسقيه
كاس الهوان .. وضرب حدب صقيله
سلطان .. من مثلك بياصل هقاويه
كود الذي فعل الأوايل دليله
سلطان .. من له ورث ما هو مخيله
والطيب ورث جدودنا .. والفضيله
سلطان .. من ربي يحبه ويهديه
لابد ما يظهر على كل جيله
قالوا قصدت: وقلت أنا مقصدي فيه
مدحي لأخوي اليوم يكفي قليله
كيف الشعر في الطيب .. عذبه قوافيه
مثل الغدير اللي صفا سلسبيله
---------
قصيدة صياح الباب

صياح الباب يكفي لا ظهرت وبكتم صياحي
لك الله لو تبيني اصرخ حبيبي لا تهج الباب
تكلم واحرق بنار العتب طيني والواحي
عيوني لك مرايا لو تبي وافتح ضلوعي كتاب
وان مات الحكي ما عاد ينفع ضحكي ونواحي
يقولون الذي كاره يلاقي للفراق اسباب
حبيبي والوداع نعاس نجم والجفن صاحي
واحلام الرماد ولفتة تملي الدروب غياب
امانة لو عشقت في يوم غيري تذكر جراحي
ولا تترك حبيبك ما بقى للعاشقين عتاب
مفارق والذي يخليك لحظة بطفي مصباحي
تعرى الدمع ساعدني البسه الظلام ثياب
---------
قصيدة العين مشتاقه

يا عاذلي .. ما تشوف العين مشتاقة
لولا الحيا جاوبتك بدمعها الصافي
عطني جلد .. كان تنخاني على فراقه
ودي الي من تركته ما أشبح خلافي
لاح الجبين .. وجذبني نوض براقه
حيثه ربيعي .. وورد الخد مصيافي
والغصن لولا المطر ما أخضرت أوراقه
يا كيف عشب الوسم يترك وينعافي

**عبودي اللغبي** · 11-09-2007, 08:25 AM

قصيدة عقد وسوار

لا شــاري عــقـدِ ولا مـهـدي سـوار
لا تلحـقي نفـسك همـوم وحـسـايف
تريثيي يـا قــرة الـعـين مــقــدار
ما تشرب عـروق القصيـد الوصـايف
لا من قـدحت الشـعـر وشـبـيـت لك نار
نارِ على روس الـهضـاب الـنـوايف
يطرب لهــا السـاري ويسـري بها الطار
وتزهر بهـا عـقب المحول الشـفايف
باهديك أنا عمر ولاكل الأعمار
يـفنى القلم قبــله وتفنى الصـحـايف
قـصيــدة تـولـد ورى بـاب وجــدار
ســر الضلوع المرهفــات النحـايف
وإلى أصـبحت طارت على متن الأسـفـار
وغنت بهـا قـبل النفــود الصـحايف
غـيبي وشـيـبي وإتركي كل مـا صـار
يبقى جـمـالك في قـصـيـدي طرايف
وخـلي الكواكب من سـنا نـورك تغــار
ولا تلـحقي نفـسك همـوم وحـسـايف
---------

قصيدة العشق والعتب

السهر وقدةٍ تصلى الجروح
والهوى ما بكت عين الجريح
في الجمر دلةٍ صفرا تفوح
وأنا قلبي على الشكوى شحيح
اقشر العشق عشقٍ ما يبوح
لين يفنا عتب أو يستريح
اقضب الليل تكفى لايروح
دام لي با الصدر عرقٍ يصيح
باكر وادع وفراق ونزوح
تطلع الشمس ونجومي تطيح
---------
قصيدة الصاحب

يا صاحبي .. والليالي سود
يا صاحبي .. والزمن صافي
اللي إلى احتجت له موجود
واللي إلى من وعد يافي
ما هو على المرجلة محدود
تقول مكتوف بكتافي
ما جور ياللي رقيت إسنود
عرض الجبل .. وانيٍ حافي
يوم الردى مسكنه فـ .. لحود
مسكنك في راس مشرافي
والله لوفي التحرص زود
كان العمر ما نقص .. وافي
وليت الرخا لا اجتمع والجود
تقاسمه شهم .. وسنافي
---------
قصيدة الغضب

نشي غيظي .. سحابٍ أسودٍ في موسم الدخان
ترزم .. وأمطر بجمرٍ غدا له بالحشى صالي
غضبت .. وما دريت إن الغضب ياصاحبي إنسان
وسيمٍ مثل سلة سيف.. وقلبه أسودٍ بالي
هدمت الدار من قل الحصى لأجل أرجم الخلان
وقتلت النور .. من كثر الجفا با فارق ظلالي
وحثيت الريح..في وجه التراب وهبت القيعان
تحت أقدامي .. ومرت ديار وودعت غالي
ويوم أصحت سما نفسي .. تلفتت وصرخت .. فلان
قمر وجهك .. وشمس الدار في دمعي تغايا لي
وقفت .. وكانت الفرقا .. مشيت ولا حصل نسيان
بكيت .. ولا سقاني الدمع لا مرٍ ولا حالي
غريبٍ تزرع عيوني سراب .. وتحصد الكثبان
وحيدٍ مثل رسمٍ مبطيٍ في صحصحٍ خالي
---------
قصيدة عبرة الحبر

أبا اتنفس دام لي بالنفس حق
ياللي قصيدي فيك من حر الأنفاس
والله يالولا عبرة الحبر الأزرق
دمـعٍ نثرته من عذابي بقرطاس
لاأقول أحبك .. لين بدموعي اشرق
وقبل الصديق يحس بي نايد الناس
إلى متى .. وصلك من العمر يسرق
دونك ودون الوصل .. بابٍ وحراس
أنا فـ جبيني الشمس تظمى .. وتعرق
وانته بشوب القيظ .. ريٍ ونسناس
---------
قصيدة عظم وغضاريف
في دربـكم يا راحلينٍ ٍ منـاكيف
تـالي ليـالي القيظ وأول خـريفه
ردّوا سـلام أهل القلوب المـواليف
على الوليف اللي نشــد عـن وليفه
ردّوه لعـذوق النخيــل المهـانيف
وعلى القصـور اللي بـوادي حنيفه
دارٍٍ لهـا بالقلب عشــق وتـكاليف
يـاعـل عيـنٍٍ مـاهـوتها كـفيفه
طـبنا وشـبنا وأتـعبتنا المشـاريف
والمـرقب العـالي هبـوبه عـنيفه
يا وارديـن العـد .. كفـّوا المغاريف
اللـي بقـى دمـعٍ هـماجٍٍ ذريـفه
والله لــو دمّي يـغيث المـلاهيف
قطعت عـرقي ليـن يصفى نـزيفه
ويا حظ من لا عرف منهو ولا شيف
إن طـاب ..يحمد وإن تـردّى .. بكيفه
وحنا ورثنا العـز عظم وغضاريف
لا مـا ورثـنا العـز تـاج وقطيفة

alardha blog bannar

إعلان

KJA_adsense_ad5

ديـوان الأمير الشاعر بدر بن عبدالمحسن

ديـوان الأمير الشاعر بدر بن عبدالمحسن

التعليق

التعليق

التعليق

التعليق

التعليق

التعليق

التعليق

التعليق

التعليق

التعليق

التعليق

التعليق

التعليق

التعليق

KJA_adsense_ad6